Pagdungog sa reklamo batok ni Seno gisugdan sa konseho


GISUGDAN na sa konseho sa syudad sa pagdumala ni konsehal Edgar Cabanlas ang pagdungog sa reklamo batok ni konsehal John Michael Seno.


Kini human gimugna ang committee of the whole ni bise mayor Kikang Uy agig aksyon sa special report ni konsehal Lordan Suan kalabot sa pagkalambigit sa ngalan ni Seno sa giingong malisyosong chat messages.


Sa gipatawag nga tigom sa miaging adlaw, miatubang sa komite ang gikatahong nanumbong ingon man si konsehal Seno apan tungod kay wala pa ang ilang mga abugado si Cabanlas mimando sa matag kampo pagsumete sa ilang tagsa tagsa ka judicial affidavits ingon man judicial affidavits sa ilang mga testigo.


Tinguha niini nga mapadali ang pagresolba sa maong sumbong, pasabot ni Cabanlas.

Niini, gitakda ang subling pagdungog sa kaso sa umaabot Mayo 20, 2021 diin gimandoan ang matag kampo pagdala sa ilang abugado ingon man mga testigo.


Ang tigom gitambongan nila ni konsehal Edna Dahino, Girlie Balaba, Suzette Magtajas-Daba, Reuben Daba, Lordan Suan, Enrico Salcedo, Roger Abaday, Romeo Calizo, George Goking, Bebot Rodriguez ug Alam Lim. (SP)