Pagbutang og pansayan sa matag establisamento mando sa balaod -Seno

KLARO ug tataw kaayo diha sa National Building Code nga ang matag establisamento gikinahanglan gayud nga magbutang og pansayan.

Kini ang gipaabot ni Konsehal John Michael Seno, chairman sa komite sa Public Works, agig reaksyon sa taho ni Konsehal James Judith atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Seno nga samtang naghulat ang usa ka kliyente nga mahuman sa transaksyon dili man matagna ang panahon nga adunay mga personal nga panginahanglan.

Pero aduna usay mga higayon pananglitan diha sa mga banko nga nagdumili sa pagpagamit sa ilang pansayan tungod ug alang sa kapaseguroan sa ilang vault, sumpay sa konsehal.

Dako ang iyang pagsalig diha sa buhatan sa Building Official nga nagtrabaho pud sila kay gawas sa pagseguro nga nasunod ang mga rekisitos aron makakuha sa building permit adunay tinuig nga pag-inspeksyon sa matag establisamento, pamahayag ni Seno.

Ang taho ni Konsehal Judith giduso ni Bise Mayor Rodriguez sa komite ni Seno alang sa pagpahigayon og pagtuon ug rekomendasyon.