Pagbutang og abogado dihas OBO gihingusgan sa konseho

GIHINGUSGAN sa konseho sa syudad ubos ni Bise Mayor Kikang Uy ang pagbutang og abogado diha sa Office of the Building Official (OBO).

Kini aron adunay mohatag og mga legal assistance ug suporta diha sa pagpatuman sa Presidential Decree 1096 (National Building Code) ug mga ipatumang lagda ug reglamento, order ehekutibo, circulars ingon man mga ordinansa sa syudad.

Tumong usab niini nga masigurong lehitimo ang tanang aksyon nga ipatuman sa maong buhatan ug masigurong hamugaway ug han-ay ang pag-implementar sa tanang nahilatid sa balaod.

Nunot niini, ang konseho sa sesyon niadtong Lunes misagop og resolusyon nga naghangyo ni Mayor Oscar Moreno pag-assign og abogado diha sa maong buhatan alang sa maong katuyuan.

Ang resolusyon nga gipalabang sa konseho gipaluyuhan sa committee of the whole ubos ni Konsehal Romeo Calizo ug komite sa pamalaod ug reglamento ni Konsehal Ian Mark Nacaya.