Pag-usbaw sa insentibo sa mga atleta, gisuportahan ni Sacala

PABOR si Konsehal Kenneth John Sacala, presidente sa City SK Federation ug chairman sa komite sa youth and sports development sa  sugyot nga usbawan ang cash incentive awards sa mga atleta  nga makasakmit og medalya sa gisalmotang national ug international tournaments.

Kini human si Albby Cris Waga, Officer In-charge sa City Sports Office, atol sa tigom sa komite niadtong Biyernes  mibutyag nga  tungod sa kasamtangang kondisyon sa ekonomiya ug sa pagtaas sa cost of living    gikinahanglan nga  usbawan  na ang maong insentibo  aron usab madasig ang mga  atleta nga mo-excel sa  ilang mga sports ug maningkamot  nga makadalag  dungog sa dakbayan.

Sumala pa nga mogasto usab ang mga atleta sa ilang pag-adto sa mga gyms aron mag-ensayo  mao  nga kon kini maamendahan  dako kining tabang sa mga atleta.

Sa iyang bahin, si Konsehal Sacala mipasabot   nga 2001 pa ang kasamtangang ordinansa ug nagtaas na ang mga palaliton  ingon man pamasahe mao nga  makatarunganon  lang nga  tas-an na ang insentibong madawat sa mga atleta  aron  usab ma-ingganyo kining maningkamot  nga makadala og garbo sa dakbayan.

Nunot niini, giduso balik sa komite ang draft sa maong  sugyot ordinansa aron mabutang kon pila gayod ang gikinahanglang usbaw sa maong mga insentibo ug pagsumite niini balik sa komite sa labing dali nga panahon. (JRG/SP)