Pag-usab sa ngalan sa MES suportado sa konseho

HINIUSANG giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang pag-usab sa ngalan sa Mambuaya Elementary School ngadto sa Mambuaya Central School.

Gisuportahan sa konseho ang maong lakang kay ang pag-upgrade ngadto sa usa ka sentral nga eskuylahan dili lamang makapauswag sa mga pasilidad ug programa apan maghatag usab ug dugang oportunidad sa mga tinun-an nga makabenepisyo ug dako gikan sa dugang kalamboan sa edukasyon.

Ang Mambuaya Elementary School ang nag-unang institusyon sa edukasyon ug giila isip sentral nga eskwelahan diha sa Habagatan-Kasadpan sa Distrito 2 ug dili lang ang kabataan sa Barangay Mambuaya ang makabenepisyo niini kon dili lakip na kadtong gikan sa kasikbit nga mga barangay.

Mahinungdanon kaayo ang pag-upgrade sa maong tunghaan ug hugot kini nga girekomendar sa City Schools Division sa DepEd, Konseho sa Barangay Mambuaya ug sa Local School Board kay kini ang solusyon sa nagpadayon sa pagtaas sa populasyon kada tuig ug nagkataas usab ang panginahanglan alang sa kalidad nga edukasyon.

Ang resolusyon nga gisagop sa Konseho alang sa maong katuyoan gipangamahan ni Konsehal Suzette Magtajas-Daba, chairman sa komite sa edukasyon. (RNQuiblat/SP)