Pag-instalar og solar lights gipundohan sa Brgy 4

GILANTAW sa Konseho sa Barangay 4 nga mapanalipdan ang ilang katawhan sa mga daotang elemento.

Sa ilang regular sesyon niadtong Lunes nga gidumala ni City Vice Mayor Bebot Rodriguez, ang Konseho sa syudad hiniusang misagop sa resolusyon nga nag-uli sa ordinansa sa maong barangay nga may kalabotan sa ilang 2026 Annual Budget nga adunay bana-banang kinitaan ug galastohon nga mokabat sa P3,753,374,00 alang sa gihan-ay nga mga programa ug proyekto karong tuiga.

Gihatagan og prayoridad sa barangay ang pag-instalar og solar lights sa tanan kalye kay giila sa barangay nga kini ang pinakadali nga pamaagi pagpagkang sa krimen gawas nga makahatag og kahayag sa komunidad.

Lakip usab sa gihatagan og igong pundo ang de-clogging sa mga kanal, pagpangandam panahon sa kalamidad, mga programa alang sa pagpalambo sa kabatan-onan ug uban pa nga gilantawng maghatag og dugang kalamboan sa kinabuhi sa katawhan sa barangay. (RNQ/SP)