Pag-instalar og signages sa speed limit dihas Bayanga gisugyot ni Daba

Gisugyot ni konsehal Reuben Daba , chairman sa komite sa ethics and blue ribbon nga mabutangan og signages ang Bayanga Access Road diha sa barangay Bayanga ning syudad.

Kini ang unod sa special report sa konsehal sa sesyon niadtong Lunes nga gidumala ni bise mayor Kikang Uy.

Matod sa konsehal nga aron nga malikayan ang disgrasya sa dapit angayan nga mabutangan og mga signages ang dapit labina ang speed limit.

Gipasabot ni Daba nga personal siya nga nakabisita sa dapit og wala siyay nakita nga mga signages ug iya usab namatikdan nga kusog kaayo nga magpadagan ang mga motorista nga gaagi sa nahisgotang dapit.

Sa laing bahin, gisugyot usab sa konsehal nga ma-deputize ang mga barangay tanod sa barangay aron nga makabatantay ug makasita sa mga motorista nga dili gasunod sa hustong gikosgon sa pagpadagan.