Pag-centralize sa police station diha sa Divisoria gihingusgan

KUSGANONG gisugyot ni Konsehal Eric Salcedo, chairman sa komite sa public utilities, ang pag-centralize sa police station diha sa sentrong bahin sa syudad pinaagi sa pagbalik sa Operation Kahusay ug Kalinaw kon OKK nga gilangkoban sa nagkadaiyang opisina sa goberno nga ang tumong mao ang daling pag-responde sa mga panghitabo ug paghatag aksyon sa mga mulo sa katawhan.

Kini ang unod sa special report ni Salcedo atol sa sesyon niadtong Lunes nga gidumala ni Presiding officer Pro Tempore Konsehal Roger Abaday.

Sumala ni Salcedo nga daghan na ang insidente nga gakahitabo sa palibot hinungdan nga angayan ibalik ang OKK aron mapakgang ang mga krimen.

Pinaagi sa pagbalik sa OKK, mapalambo ang kahusay ug kalinaw sa dakbayan, matod sa konsehal.

Si Konsehal Salcedo midugang nga kinahanglan ang pag-repaso sa executive order aron tun-an kay adunay pipila ka mga opisina sa goberno ang wala pa nasukip sa maong order.

Ang maong sugyot giduso ngadto sa komite sa public order and safety ni Konsehal Roger Abaday alang sa dugang pagtuon ug rekomendasyon. (MLR/SP)