Pag-bawal pagbaligya sa ilimnong makahubog ug sigarilyo sa minor de edad giuyonan

HINIUSANG giuyonan sa Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez ang ordinansa sa Barangay F.S Catanico nga nag-dili sa mga sari-sari stores sa maong barangay sa pagbaligya sa ilimnong makahubog ingon man sigarilyo ngadto sa mga minor de edad aron malikay sila sa bisyo ug dili mahitumpawak sa krimen sama sa pagpangawat ug uban pa.

Ang maong ordinansa nagpahamtang og multa ngadto sa makasupak niini, nga mao ang pahimangno o reprimand sa mamaligyaay sa unang pagsupak; P500 ug duha ka oras nga community service sa ikaduhang higayon; samtang P1,000 ug lima ka oras nga community service o pagkonpiska sa business permit sa mosunod pang kalapasan.

Ang ordinansa nga gisumite sa Barangay F.S Catanico miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa nasangpit nga katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (MLRapanot/SP)