P962 mil gigahin sa SK Agusan sa programa nga makapadasig sa ilang kabatan-onan

KAPIN sa P962 mil ang gigahin sa Sangguniang Kabataan (SK) sa Barangay Agusan aron magamit sa pagpatuman sa mga programa nga makapadasig sa  kabatan-onan sa ilang dapit.

Kini human ang konseho sa syudad ubos ni Bise Mayor Bebot Rodriguez, sa sesyon niadtong Miyerkoles, misagop sa resolusyon nga nag-uli sa resolusyon sa Barangay Agusan diin nasukip ang ilang 2026 SK Annual Budget nga adunay gibanabanang kinitaan ug galastohon balor P3,218,931.00.

Lakip sa gipundohan mao ang programa paghatag og dugang kahibalo sa kabatan-onan sa natad sa panglawas, agriculture, gender sensitivity ug pagproteher sa kinaiyahan.

Dugang pundo usab ang gigahin alang sa active citizenship pahaom sa kasaulogan sa Linggo ng Kabataan ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.

Ang maong budget miagi sa makuting pagsusi ug deliberasyon sa buhatan sa City Planning and Development Office (CPDO), Oro Youth Development Council uban sa mga hintundang buhatan sa City Hall aron maseguro nga kini nahiuyon sa balaod.

Ang resolusyon nga gisagop sa konseho alang sa maong katuyoan gipaluyohan sa komite sa sports and youth development ni Konsehal Kenneth John Sacala ug sa komite sa pamalaod ug reglamento ni Konsehal Edgar Cabanlas. (RNQ/SP)