P7.8B, budget sa CDO sa 2023 aprobado na
Gilantaw nga mapatuman ug maangkon ang mga tumong ug tinguha sa lokal nga kagamhanan ubos ni Mayor Klarex Uy nga nakatutok sa RISE development agenda/formula sa iyang administrasyon nga mao ang R-egional Leadership: Metropolization, Accessibility ug Connectivity; I-nstitutional Development and Participatory Governance; S-afety, Security and Human Development, ug E-conomic Recovery.
Kini human giuyonan sa konseho sa sesyon sa Lunes ubos ni Bise Mayor Bebot Rodriguez ang balor P7.8 bilyones ang gisugyot ni Mayor Klarex Uy nga budget sa dakbayan sa Cagayan de Oro alang sa umaabot tuig 2023 nga naglangkob sa P6.82 bilyones kapin alang sa General Fund ug P977 milyones kapin alang sa Special Account – Local Economic Enterprises/Utilities.
Kini adunay omento nga P300 milyones gikan sa P7.5 bilyones nga budget karong tuig 2022.
Gihatagan og dakong pahat ang sektor sa katilingbanong serbisyo nga mokabat sa P3.01 bilyones kon 39% nga naglakip sa P1.52 bilyones nga pundo alang sa Health, Nutrition, and Hospital Services ug P1.48 bilyones kapin nga pundo alang sa Social Security, Social Services and Welfare.
Samtang ang Economic Services sector adunay 33% nga pahat kon kapin sa P2.53 bilyones ug ang General Public Services sector adunay 29% kon kapin sa P2.24 bilyones.
Matod ni Mayor Uy nga sa unang budget sa iyang administrasyon dako ang iyang paglaum nga mopatigbabaw ang panaghiusa alang sa katawhan sa dakbayan kinsa naghatag sa ilang pagsalig sa mga nangagamhanan.
Niini, ang administrasyon mimugna sa komprehensibong all-inclusive budget ilabina ning panahon nga gitinguha ang pagbangon sa ekonomiya pinaagi sa pagseguro nga kadtong mga andam nang ipatuman nga mga programa, proyekto ug mga kalihokan nga nasulod sa Comprehensive Investment Development Plan (CIDP) ug Annual Investment Program (AIP) ang mapundohan.
Ang ordinansa nga gipalabang sa konseho alang sa maong katuyoan gipaluyohan sa gimugnang Committee of the Whole nga gipangunahan ni Konsehal Alam Lim isip Chairman sa panalapi.