P38M annual budget sa Lumbia giuyunan sa Konseho

MAPATUMAN na sa Barangay Lumbia ang mga programa ug proyekto nga gipundohan sa ilang 2024 annual budget. Kini human ang Konseho sa Syudad sa sesyon kagahapon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa maong barangay diin nasukip ang ilang annual budget balor P38,731,920.00.

Lakip sa gipundohan sa mao ang proyekto pagtul-id sa Multi-Purpose Hall-BADAC/CDRP Building, rehabilitasyon ug pagpalambo sa Multi-Purpose Hall-Gym, rehabilitasyon sa child development center, pagtul-id sa  kadalanan sa barangay, pag-instalar og street light system ug pagtukod  og drainage system.

Dugang niini, gigahinan usab og igong pundo alang programa paghinlo ug pagtangtang sa mga nakabara sa drainage, pagtukod og multi-purpose hall extension, paggahin og igong pundo panahon sa kalamidad ug youth development program sa Sangguniang Kabataan.

Ang resolusyon nga gisagop sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ni Konsehal Edgar Cabanlas.