P3.3M balor nga 2022 Annual Budget sa Brgy 38 aprobado sa konseho

UBAY-UBAYNG mga programa ug proyekto sa Barangay 38 ang gipaabot nga mapatuman karong tuiga.

Kini human ang Konseho sa syudad sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa barangay diin nasukip ang ilang 2022 Annual Budget nga adunay gibanabanang kinitaan ug galastohon balor P3,342,826.00.

Lakip sa mga proyekto nga ipatuman sa barangay mao ang pagrehabilitar sa ilang drainage system, material recovery facilities, pagpalit sa Covid 19 related items ug uban pa nga gilantawng magpalambo sa kinabuhi sa katawhan nga ilang gialagaran.

Niini, si Konsehal Yan Lam S. Lim, chairman sa komite sa barangay affairs, mibutyag nga ang gisumeteng budget sa barangay miagi sa makuting deliberasyon sa mga komite sa konseho ug nahiuyon sa balaod.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Lim ug komite sa pamalaod ni Konsehal Ian Mark Nacaya.