P250M gigahin alang sa mga iskolar sa dakbayan sa 2022

PADAYON ang paghatag sa administrasyon ni Mayor Oscar Moreno og igong pagtagad sa kaugmaon sa kabataan sa dakbayan.

Sa gisumeteng executive budget alang sa umaabot tuig 2022, mokabat sa P250 milyones ang igahin sa kagamhanan sa dakbayan alang sa Student Scholarship Fund.

Kini naglangkob sa bayad alang sa tuition fees, matriculation, other fees, laboratory fees ug stipend allowance sulod sa napulo ka bulan sa tanang iskolar sa syudad.

Nasayran nga sa kasamtangan adunay 6 mil ka mga tinun-an nga gipatungha ang dakbayan dinha sa lain laing pribado ug publikong unibersidad ug kolehiyo sa syudad ug posibleng madugangan pa sa pagsugod sa bag-ong tuig ting klase sunod tuig.

Ang pundo maglangkob sa balayronon sa mga tunghaan alang sa second semester ug summer semester sa tuig 2021-2022 ug first semester ug second semester sa tuig tingtungha 2022-2023.

Dako ang panghinaut sa mayor nga sa pag-uyon sa konseho sa dakbayan ubos ni Bise Mayor Kikang Uy sa maong gisugyot nga pundo makahuman sa ilang pagtungha ang kabatan-onan sa dakbayan taliwala niining nasinating pandemya dala sa Covid-19.