P14.78M gigahin alang sa Tablon, Lumbia Hospital

PADAYONG gihatagan og igong  pagtagad sa administrasyon ni Mayor Klarex Uy ang natad sa panglawas ug gilantaw nga matagamtaman usab sa katawhan ang dugang kalamboan sa dakbayan.

Kini human ang Konseho sa Syudad ubos ni Bise Mayor Bebot Rodriguez sa sesyon niadtong Lunes nisagop sa Resolution No. 15520-2025 sa pag-aprobar sa 2025 Supplemental Annual Investment Program (SAIP) No. 3 nga diin nasukip niini ang P14.78 milyones nga gitagana alang  sa mga proyekto sa mga balay tambalanan sa syudad.

Kini naglangkob sa paghatag og mga Information Technology (IT) equipment diha sa Lumbia Hospital balor P2.18 milyones ug Tablon Hospital P1 milyon.

Samtang  balor P4.6 milyones usab ang gigahina alang sa pagpalit og 24 ka unit nga air conditioner dala ang instalasyon niini ug balor P7 milyones alang sa X-ray machine n nga magamit sa operasyon diha sa Tablon Hospital.

Si Mayor Uy nipasabot nga ang tumong sa maong lakang naglatid sa mga prayoridad nga programa ug proyekto alang sa maong katuyoan. (RNQ/SP)