Osorio gitudlong ambassador of goodwill ngadtos USA

ANG konseho sa syudad ubos ni Bise Mayor Bebot Rodriguez mitudlo ni Liam Osorio nga Ambassador of Goodwill ngadto sa Estados Unidos (USA).

Kini human gisagop sa konseho sa milabayng sesyon ang Resolusyon No. 14262-2022 alang sa maong katuyuan.

Si Konsehal Suzette Magtajas-Daba, chairman sa komite sa edukasyon, mibutyag nga si Osorio usa sa labing unang benepisaryo sa City College Scholarship Program (CCSP) human kini gipalapdan pinaagi sa City Scholarship Code of 2018.

Usa usab siya sa mga National Awardee sa 10 Outstanding Youth sa nasud.

Nasayran nga usa si Osorio sa unom ka mga Pinoy nga napili ubos sa Academic Fellowship (Student Category) sa Governance and Society Institute of the Young Southeast Asian Leaders Initiative Professional Fellows Program (YSEALI PFP) nga gipasiugdahan sa United States Department of State Bureau of Educational and Cultural Affairs.

Mahinumdoman nga ang konseho misagop usab og resolosyon nga nagtudlo ni Ritchel Petalcorin-Dahay nga Ambassador of Goodwill ngadto sa USA alang sa susamang programa.

Ang makanunayong pagka-scholar leader ni Osorio ubos sa mentorship sa buhatan sa City Scholarship sa panguna ni Dahay ug pagtukod sa kapunungan sa mga iskolar sa dakbayan dinha sa barangay Carmen, pagmugna sa Non-Government Organization (NGO) Tabang Sikad atol sa pandemya ug kalantip sa salabutan ang naghimo kaniya nga makaadto sa Atlanta City, Georgia, USA.

Ang resolosyon nga gisagop sa konseho alang sa maong katuyoan gipaluyohan nila ni Konsehal Suzette Magtajas-Daba, Malou Gaane, George Goking, Jay Pascual ug Imee Rose Moreno.