NHA Housing Project matukod sa Brgy. Nazareth

HUGOT nga gisuportahan sa Konseho sa syudad ang tinguha sa Barangay Nazareth ubos ni Punong Barangay Atty. Regine Rodriguez nga mahatagan og pinuy-anan ang mga biktima sa sunog sa ilang barangay.

Kini human hiniusang giuyonan sa Konseho atol sa regular sesyon niadtong Lunes nga gidumala  ni Bise Mayor Bebot Rodriguez ang ordinansa nga nag-aprobar sa Development Permit (DP) sa NHA-Barangay Nazareth Housing Project.

Ang maong proyekto gi-apply sa National Housing Authority (NHA) ubos sa BP 220 nga adunay 35 ka lote ug gilapdon nga 1,929 square meters.

Matod ni Punong Barangay Rodriguez nga kining mga bakwit nga pamilya mga biktima sila sa dakong sunog niadtong Pebrero 2023, ug nangayo sila og tabang sa konseho sa barangay ug sa tag-iya sa yuta aron maangkon nila ang  permanente nga kapoy-an.

Ang maong balaodnon miagi sa makuting pagrepaso ug sa kondisyon nga gipahamtang sa buhatan sa City Engineer, City Housing and Urban Development Department, ug sa City Planning and Development Coordinator.

Ang maong ordinansa gipaluyohan sa komite sa subdivision and landed estate ug sa komite sa pamalaod ubos ni Konsehal Edgar Cabanlas. (RNQ/SP)