Natad sa paugnat sa kusog gipundohan sa Brgy Pagatpat

MOKABAT sa P500 mil ang gigahin sa Sangguniang Kabataan (SK) sa Barangay Pagatpat aron magamit dinha sa pagpatuman sa mga programa sa paugnat sa kusog.

Kini human ang Konseho sa Syudad ubos ni Bise Mayor Kikang Uy sa sesyon niadtong Lunes misagop sa resolusyon nga nag-uli sa ordinansa sa Pagatpat diin nasukip ang ilang 2022 SK Annual Budget nga adunay gibana banang kinitaan ug galastohon balor P2,095,995.00.

Gihatagan sa prioridad sa SK sa barangay nga mapatuman karong tuiga mao ang pagrehabilitar sa ilang Basketball Covered Court ug pagpalit sa mga gamit alang sa paugnat sa kusog.

Migahin usab ang barangay og igong pundo nga magamit alang sa kampanya kontra droga, pagproteher sa kinaiyahan, pagpalit og usa ka unit nga computer ug outdoor projector ug uban pang programa alang sa kaarangan ug kalamboan sa kabatan-onan sa dapit.

Ang resolusyon nga gisagop sa Konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Ian Mark Nacaya.