Nacaya nangusog maimplementar ang probisyon sa traffic code sa syudad

GIHINGUSGAN ni Konsehal Ian Mark Nacaya, chairman sa Komite Sa Research, Management And Innovation, ang hingpit nga pag-implementar sa pipila ka probisyon sa traffic code sa syudad.

Sa iyang special report sa sesyon sa Konseho niadtong Lunes nga gidumala ni Bise Mayor Bebot Rodriguez, maoy gitumbok ni Nacaya ang section 116 nga may kalabotan sa route codes.

Ang maong section nagmando nga alang sa kasayon sa publiko kinahanglan nga i-establisar ang route codes sa mga PUJ gamit ang hiyas sa usa ka maayong lungsoranon agig suporta sa deklarasyon sa dakbayan isip City of Character ug dayag kini nga i-imprinta sa isigka kilid sa sakyanan.

Ug kon ang rota sa PUJ molatas sa bisan asa nga tourist spot sa syudad, kinahanglan nga i-imprinta usab ang ngalan sa tourist spot diha sa isig ka kilid sa maong sakyanan isip kabahin sa ilang rota.

Sumala ni Konsehal Nacaya nga iyang gilantaw ang usa ka dakbayan nga matahom ug angayan ikapasigarbo.

Niini gitugyan ni Konsehal Nacaya  ang pagpatuman sa maong probisyon sa traffic code. (JRGalano/SP)