Nacaya misugyot direktang makiglambigit ang syudad pagresolbar sa problema sa COWD

“Let’s act jointly.”

Kini ang gibutyag ni Konsehal Ian Mark Nacaya, chairman sa komite sa planning and research sa Konseho, agig reaksyon sa special ni Konsehal Edgar Cabanlas  sa session niadtong Lunes nga gidumala ni Presiding officer Pro Tempore Konsehal Romeo Calizo kalabot sa kasamtangang  kahimtang sa Cagayan de Oro Water District.

Matod sa konsehal nga  tungod ug alang sa katawhan, kinahanglan  nga  manginlabot  ang  konseho  sa pagresolbar sa problema  aron  makahatag  ang COWD sa de kalidad nga serbisyo ug de kalidad nga tubig  kay mahinungdanon kaayo ang tubig sa kinabuhi sa tawo.

Gani,  sumala ni Konsehal Nacaya nga adunay gitudlo nga interim board ug interim manager aron nga sa mubo nga panahon, adunay mapaabot nga maayong epekto  nga makamugna sa hamugaway nga sitwasyon  apan kon  ang susama  lang gihapon  ang mabati gikan sa nagdumala, naa gayoy problema.

Gipasabot  ni Konsehal Nacaya nga labing maayo nga atubangon  ug  direkta nga makiglambigit ang syudad ug dili lang kay  kutob  ra sa pagpadala  og resolusyon.

Busa  siya misugyot  sa pagpatawag sa tanang  hintungdang ahensya uban ang  kadagkoan sa Local Water Utilities Administration aron  kini malingkoran  ug  sa ingon maresolbar alang sa kaayohan sa katawhan. (JRGalano/SP)