Nacaya mikwestyon sa kausaban sa gitrabahong Kagay-an Bridge

Unsa ang kausaban sa gitrabahong Kagay-an Bridge nga nagkonektar sa barangay Nazareth ngadto sa barangay Carmen sulod sa duha ka tuig?

Mao kini ang pangutana ni Konsehal Ian Mark Nacaya, chairman sa komite sa planning and development, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Duha ka tuig nga gitrabaho ang approach sa maong tulay dinha sa Carmen apan sa pag-abli balik ngadto sa mga motorist sa milabayng semana, walay kausaban nga nahimo sa maong tulay, dugang sa konsehal.

Siya mipadayag sa iyang katingala nga pareha ra man ang natukod nga straktura sa wala pa giguba ug sa natul-id na.

Unsa kaha ang kabag-ohan, unsay gitrabaho nga giguba ang tulay? Ug kun susama lang ang pagbalik sayang ang pundo nga gigamit nga unta nadapat sa unsa may angayan nga mga programa nga magdala og dugang kaarangan sa kinabuhi sa katawhan, sumpay ni Nacaya. Gani, siya mibutyag nga walay billboard nga nagpakita sa pagpatuman sa proyekto, pila ang gigasto ug asa gikuha ang pundo.

Ang akong pagtuo nga adunay tukurong lateral road nga mo-entra sa wala ug tuong bahin gikan sa Acacia street paingon sa tulay aron mahatagan sa alternatibong dalan ang mopaingon sa barangay Carmen ug Balulang. Apan, wala may gihikay nga dalan nga moagi sa Acacia Street, pamahayag ni Nacaya.

Ang taho ni Nacaya giduso ni Bise Mayor Bebot Rodriguez ngadto sa komite sa public works ni Konsehal John Michael Seno.