Mulo sa transport coops tukion sa komite sa public utilities

HISGOTAN sa umaabot tigom sa komite sa public utilities ni Konsehal Eric Salcedo ang gipadangat nga mulo sa mga transport cooperative sa syudad kabahin sa ilang nasinati nga problema sa ilang ruta nga posibleng makapaundang sa ilang operasyon ug panginabuhian.

Kini human nasinati sa maong kooperatiba ang pagka-alkanse ug apektado ang ilang mga biyahe tungod sa nagpadayong operasyon sa mga bao-bao, habal-habal ug motorela nga mosubay sa ilang mga ruta.

Gihangyo sa maong kapunongan ang komite nga masolusyonan ang nasangpit nga problema ug madugangan ang mga ruta nga ilang gisugyot.

Niini gidapit sa komite nga motambong sa tigom sila si Atty. Hilario Roy Raagas, City Administrator, Atty Kenneth Tamala, City Legal Officer, Engr. Nonito Oclarit, Acting Department Manager sa Roads and Traffic Administration, ug Atty. Abosamen Matuan, Regional Director sa LTFRB-10, aron mopaambit sa ilang panahom ug opinyon sa maong isyu. (MLR/SP)