MOU pagpalig-on sa KP system suportado ni Goking

HUGOT nga gisuportahan ni Konsehal George Christopher Goking, chairman sa komite sa trade and commerce, ang Memorandum of Understanding (MoU) tali sa kagamhanan sa dakbayan ug sa Department of the Interior and Local Government (DILG), Integrated Bar of the Philippines (IBP)- Misamis Oriental Chapter, Liceo College of Law, Xavier University-School of Law, Liga ng mga Barangay, ug Office of the City Prosecutor.

Kini ang gipahibalo sa konsehal atol sa sesyon sa Konseho nga gidumala ni Bise Mayor Bebot Rodriguez human gipirmahan ang maong MoU niadtong Oktubre 24, ning tuig.

Tumong sa MoU ang pagpalambo sa kahibalo sa tanang miyembro sa Lupong Tagapamayapa sa pagpatuman sa sistema sa Katarungang Pambarangay dinhi sa dakbayan.

Nagtinguha usab kini nga matubag ang kakulang sa kahanas ug kahibalo sa mga miyembro sa Lupon pinaagi sa pagbansay kanila labina alang sa mediation ug conciliation sa mga kaso diha sa barangay level aron malikayan ang paghuot sa mga kaso diha sa regular nga korte.

Matod ni Goking usa ka simbolo sa panaghiusa ug pakigtambayayong sa lokal nga pangagamhanan ug mga hingtundang ahensya alang sa mas epektibo nga paghatag ug hustisya ug serbisyo sa katawhan sa barangay. (RNQ/SP)