Moreno nangusog mapalig-on dulang badminton sa CDO

Atong palig-onon ang dulang badminton dinhi sa dakbayan sa Cagayan de Oro.

Mao kini ang kusganong gipadayag ni Konsehal Imee Moreno atol sa miaging tigom sa komite sa Sports and Youth Development ni Konsehal John Michael Seno.

Matod sa konsehal nga daghang Kagay-anon ilabina ang mga tinun-an nga mahiligon sa badminton apan wala makatagamtam sa igong suporta tungod sa kakulangon sa facilidad.

Niini, si Moreno mihangyo ni Seno nga mahatagan unta og luna diha sa gitukod nga Sports Complex sa barangay Lumbia ang badminton court.

Matod niya nga pipila na ka investor ang iyang nakahinabi ug naimbitahan aron mamahimong kaabag sa sugyot pagtukod og badminton court diha sa maong Sports Complex.

Dako iyang panghinaut nga pinaagi sa paghatag og tukmang facilidad mas mapalig-on pa ang dulang badminton ug niini, daghang mga Kagay-anong atleta ang ma-agni nga magbansay bansay sa maong matang sa paugnat sa kusog.