MOD board game aprobado sa Konseho

GILANTAW nga kining panagtambayayong sa syudad makahatag sa malungtaron nga  kalamboan sa pagpangandam panahon sa katalagman.

Kini human ang Konseho  atol sa regular sesyon  kagahapon  nga gidumala Bise Mayor  Bebot Rodriguez mipalabang og ordinansa nga naghatag katungod ni City Mayor Klarex Uy pagpirma sa Memorandum of Understanding (MoU) tali sa Asia Society for Social Improvement and Sustainable Transformation (ASSIST) nga girepresentahan ni Director for Programs, Mr. Francis A. Macatulad.

Kini naglangkob sa pakigtambayayong sa syudad sa pag-mainstream sa edukasyon sa pagdumala sa disaster risk management pinaagi sa Master of Disaster (MOD) board game nga mahimong himan sa mga benepisaryo sa ilang  kahibalo ug kahanas sa pagpangandam panahon sa katalagman, pagtubag ug kalig-on    nga  motubag sa tukma sa panahon sa emerhensya.

Unang  gipunting sa maong  programa  ang  paghatag gahum sa mga estudyante sa elementarya sa pagkaandam sa katalagman, paghimo sa usa ka aktibo nga pagtubag sa kultura sulod sa ilang komunidad ug pagbaton og kahibalo  ingon man kahanas uban  ang suporta sa mga magtutudlo nga gibansay pinaagi sa training of trainers (ToT) session.

Ang maong ordinansa nga gipalabang sa Konseho alang sa maong katuyoan gipaluyohan sa komite sa climate change adaptation & mitigation and disaster risk reduction ni Konsehal Nicolo Paulo Gaane ug sa komite sa pamalaod ug reglamento ubos ni Konsehal Edgar Cabanlas. (RNQ/SP)