MoA tali’s CEM giuyonan sa konseho

- Sa pagseguro nga patas ang pagpili sa mga iskolar sa CDO

SA tinguha nga mahatagan sa patas nga kahigayonan ang tanang aplikante sa 2023 College Scholarship Program sa dakbayan, giuyonan sa konseho sa syudad sa sesyon kagahapon nga gidumala ni Bise Mayor Bebot Rodriguez ang ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Center for Education Measurement (CEM), Inc.

Kini naglangkob sa testing program nga magamit sa kagamhanan alang sa screening ug pagpili sa mga aplikante sa City Scholarship Program.

Ubos sa MoA, ang CEM mao ang maghatag sa mga instrumento sa pasulit, pagsiguro sa confidentiality ug seguridad ug ang kahapsay sa pasulit uban sa koordinasyon sa City Scholarship Committee, paghatod og test booklets, answer sheets ug uban pa.

Dugang pa, ang dakbayan mao ang mag-recruit ug magproseso sa aplikasyon sa mga kwalipikadong benepisaryo sa programa, maghatag og lugar nga luwas aron magmalampuson ang ipahigayong pasulit, magbayad og maghikay sa listahan sa mga rehistradong examinees, ug uban pa.

Si Konsehal Suzette Magtajas-Daba, chairman sa komite sa edukasyon ug usa sa nagpaluyo sa gipalabang nga ordinansa, miingon nga dako kini nga kahigayonan sa tanang incoming first year nga kun mapili silang benepisaryo sa maong programa makahuman gyud sila sa ilang pag-eskwela aron maangkon ang hayag nga kaugmaon.