MOA tali MSU-IIT tukion sa komite ni Daba

GILANTAW ang panagtambayayong tali sa MSU-IIT ug City College of Cagayan de Oro alang sa pagpalambo sa kapabilidad sa pagtudlo ug panukiduki.

Kini human konsiderahon sa komite sa edukasyon ni Konsehal Suzette Magtajas-Daba ang Memorandum of Agreement (MOA) tali sa Kagamhanan sa Dakbayan sa Cagayan de Oro pinaagi sa Cagayan de Oro City College ug Mindanao State University-Iligan Institute Technology (MSU-IIT).

Ubos niini nga kasabutan,  ang MSU-IIT mohatag sa ilang tabang ngadto sa mga magtutudlo sa City College sa pagpasayon sa pagkat-on ug propesyonal nga kalamboan pinaagi sa pagbansay, mga programa ug community extension services uban sa Cagayan de Oro City College.

Malaumon si Konsehal Daba nga makatambong sa ilang tigom ang mga hintungdang ahensya ug mga hepe sa buhatan sa City Hall aron makuha ang ilang mga opinyon alang sa tukmang rekomendasyon. (RNQuiblat/SP)