MOA tali MSU-IIT aprobado sa Konseho

GIHINGUSGAN sa kagamhanan sa dakbayan sa Cagayan de Oro nga mapalambo sa kapabilidad sa pagtudlo ug panukiduki sa mga magtutudlo sa City College of Cagayan de Oro ug sa Mindanao State University-Iligan Institute Technology (MSU-IIT).

Sa regular sesyon niadtong Lunes nga gidumala ni City Vice Mayor Bebot Rodriguez, hiniusang mipalabang ang Konseho sa syudad sa ordinansa nga naghatag katungod ni City Mayor Klarex Uy pagpirma sa Memorandum of Agreement (MOA) tali sa Kagamhanan sa Dakbayan sa Cagayan de Oro pinaagi sa Cagayan de Oro City College ug MSU-IIT nga girepresentahan ni Chancellor, Prof. Alizedney M. Ditucalan, JD, LLM.

Kini naglangkob sa kolaborasyon sa pagpatuman sa Lifelong Learning and Professional Development (LLPD).

Sa maong kasabutan, ang MSU-IIT mohatag sa ilang tabang ngadto sa mga magtutudlo sa City College sa pagpasayon sa pagkat-on og propesyonal nga kalamboan pinaagi sa pagbansay, mga programa ug community extension services sa  City College.

Ang maong ordinansa nga gipalabang sa Konseho alang sa maong katuyuan gipaluyuhan sa komite sa edukasyon ni Konsehal Suzette Magtajas-Daba ug sa komite sa pamalaod ug reglamento ni Konsehal Edgar Cabanlas. (RNQuiblat/SP)