MOA tali CEM giuyonan sa Konseho

GITINGUHA sa kagamhanan nga mapatuman  ang  patas nga  proseso sa screening ug pagpili sa mga benepisaryo sa 2025 City College Scholarship Program sa dakbayan.

Sa sesyon sa  konseho  niadtong Lunes  nga  gidumala ni ni Presiding Officer Pro Tempore Konsehal Romeo Calizo hiniusang  gipalabang  ang ordinansa nga naghatag  katungod ni Mayor Klarex Uy pagpirma  sa Memorandum of Agreement (MOA) tali sa Center for Education Measurement (CEM), Inc.

Kini kabahin sa testing program sa kagamhanan  nga magamit sa pag-ayag sa mga aplikante sa City College Scholarship Program sa dakbayan.

Tipik sa  nakalatid sa MOA, nga ang CEM mao ang maghatag og mga instrumento sa pasulit, pagsiguro sa confidentiality  ug kahapsay sa pasulit uban ang  koordinasyon sa city scholarship committee, paghatod og test booklets, answer sheets ug uban pa alang sa maong katuyoan.

Samtang ang kagamhanan sa dakbayan mao usab  ang  magproseso sa aplikasyon sa mga kwalipikadong benepisaryo sa programa, mogahin  og dapit nga luwas alang sa malampuson  nga pasulit, magbayad ug magpreparar sa listahan sa mga rehistradong examinees ug uban pa.

Niini, si Konsehal Suzette Magtajas-Daba, chairman sa komite sa edukasyon, miingon nga dako kini nga kahigayonan sa tanang umaabot  nga first year college nga kun mapili silang benepisaryo sa maong programa makahuman gyud sila sa ilang pag-eskwela ug makaangkon sa hayag nga kaugmaon. (RNQuiblat/SP)