MOA sa pagpatuman sa SSS self-employed program giuyonan

GILANTAW sa kagamhanan sa dakbayan nga mahatagan og social security protection ang mga empleyado batok sa sakit, pagpanganak, pagretiro, baldado, kamatayon ug uban pang mga panginahanglanon.

Kini human ang Konseho sa Syudad atol sa regular sesyon niadtong Lunes nga gidumala ni City Vice Mayor Bebot Rodriguez mipalabang og ordinansa nga naghatag katungod ni City Mayor Klarex Uy pagpirma sa Memorandum of Agreement (MOA) uban sa Social Security System (SSS).

Kini naglangkob sa panagtambayayong sa pagpatuman sa coverage ug membership program nga maglakip sa job order workers (JO) ug contract of service (COS) personnel sa siyudad ubos sa SSS Self-Employed Program subay sa Republic Act (RA) 11199 kon Social Security Act of 2018.

Nakalatid sa MoA nga ang syudad mag-assign og permanenteng liaison officer alang sa SSS, magdasig sa tanang COS JO personnel nga magparehistero sa self-employed member sa SSS ug magpadayon sa pagbayad isip voluntary members sa SSS, awtomatikong kuhaon ang binuwan nga kontribusyon gikan sa sweldo ug suhol, ug pag-remit sa maong kontribusyon sa labing duol nga SSS Branch o sa accredited payment center, ug uban pa alang sa maong katuyoan.

Samtang ang SSS magpahigayon sa on-site registration ngadto sa kwalipikadong COS/JO personnel, mag-assign sa account officer nga maoy magdumala sa account ug motabang sa implementasyon, magproseso sa rehistro, mag-monitor sa remittance ug mag-post sa binuwan nga kontribusyon, maghatag og seminar/pagsabwag sa impormasyon bahin sa mga benepisyo, pribilehiyo sa pautang, ug uban ubang  programa sa SSS. (RNQ/SP)