MOA sa pagpatuman sa RISE scholarship program giuyonan

GIHINGUSGAN sa kagamhanan sa dakbayan sa Cagayan de Oro nga mahatag ang malahutayong oportunidad sa edukasyon ug pagbansay sa kahanas sa mga lumolupyo pinaagi sa nagkalain-laing programa aron mapalambo ang pagpanarbaho ug sa ingon masuportahan ang mga lokal nga industriya.

Kini human ang Konseho sa Syudad atol sa regular sesyon niadtong Lunes nga gidumala ni City Vice Mayor Bebot Rodriguez mipalabang og managlahing ordinansa nga naghatag katungod ni City Mayor Klarex Uy pagpirma sa Memorandum of Agreement (MOA) ug Data Sharing Agreement tali sa F&B Training Center, Inc. (TVI), nga girepresentahan ni Chaiman/CEO, Mr. Renato S. Sumania, ug sa Intercare Training School, Inc. (TVI), nga girepresentahan ni School President, Atty. Jenny G. Uplinger, CPA.

Kini naglangkob sa panagtambayayong sa pagpatuman sa Relevant Industry Skills for Employment (RISE) Scholarship Program sa syudad.

Subay usab kini sa Safety, Security, and Human Development component sa RISE agenda sa kagamhanan diin ang edukasyon gihatagan sa igong pagtagad.

Tinguha sa maong kasabotan nga mahatagan ang mga kwalipikado nga residente sa technical vocational training nga molungtad sa paghatag sa National Certificates (NC I ug NC II) nga makapahimo kanila nga kabahin sa malungtarong kalamboan.

Sa maong MoA nauyonan nga ang syudad ang magdumala ug mag-abaga sa gasto sa pagbansay.

Samtang ang Technical Vocational Institution (TVI) ang maghatag og programa sa pagbansay ilabina sa in demand ug hard-to-fill-skills, magdumala sa enrollment sa mga trainees, pagsiguro sa 100% nga rate sa trabaho sa mga nakakompleto sulod sa 6 ka bulan gikan sa pagbansay, masayon nga on the job training, oportunidad sa pagpanarbaho, ug uban pa.(RNQuiblat/SP)