Mga sugyot ordinansa sa barangay tukion sa komite ni Konsehal Tabac

MAGTIGOM karong adlawa ang komite sa barangay affairs ubos ni Konsehal Marlo Tabac alas 9:00 sa buntag diha sa hawanan sa konseho.

Kini aron paghisgot ug mahatagan sa tukmang aksyon ug rekomendasyon ang mga pipila nga sugyot balaodnong ordinansa sa nagkadaiyang barangay sa syudad.

Tipik sa hisgotan ang managlahing sugyot ordinansa sa Barangay Nazareth ang mga programa kabahin sa “Tugkaran Ko, Limpyohan Ko” ug ang pagpatuman sa anti-illegal dumping ug paghatag multa sa makalapas niini.

Lakip sa hisgotan ang Barangay Mambuaya Ordinance No. 1-2024 sa pag-regulate sa pagbaligya sa sigarilyo ug ilimnon ug pagdili sa mga menor de edad sa pagpalit niini sulod sa hurisdiksyon sa barangay ug ang sugyot ordinansa sa Barangay Lapasan nga kinahanglan ang mga apartment, boarding house sa pagsubmite sa listahan sa ilang mga tenant o nag-abang sa katuyoan sa pagrekord.

Niini, gidapit sa komite sa pagtambong sa maong tigom  aron madungog ang ilang mga hunahuna ug opinion sila si City Administrator Atty. Hilario Raagas, City Legal Officer Atty. Kenneth Tamala, CLENRO OIC Elvisa Mabelin, Nazareth Punong Barangay Atty. Regine Beatrice Rodriguez, Mambuaya Punong Barangay Philip Poras ug Lapasan Punong Barangay Julito Ogsimer.

Gipaabot usab nga motambong sa tigom sila si Konsehal Kenneth John Sacala, Jonjon Rodriguez, Al Legaspi, Sr., Paolo Nicolo Gaane, Edgar Cabanlas, Aga Suan, ug Bise Mayor Rodriguez. (RNQ/SP)