Mga proyekto, programa sa Barangay 15 maimplementar na

HINGPIT nang  maimplementar sa Barangay  No. 15 ang ilang gitinguha nga mga programa ug proyekto nga gipundohan karong tuiga.

Kini human ang Konseho sa Syudad  sa sesyon niadtong Lunes nga  gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2024 Annual Budget nga adunay gibanabanang kinitaan ug galastuhon balor P4,758,730.00.

Lakip sa gipundohan mao ang 20 porsyentong (20%) Development Fund balor P691,346.00; samtang P457,873.00 usab ang gigahin alang sa pagpatuman sa mga programa ug proyekto sa Sangguniang Kabataan; P200,000.00 ang gigahin alang sa pag-instalar ug CCTV palibot sa maong barangay; P130,000.00 alang sa pag-rehabilitar ug pagpalapad sa ilang Drainage System ug uban pang mga programa nga gilantawng makahatag kaarangan sa pagserbisyo sa ilang katawhan.

Ang ilang 2024 annual budget sa Barangay 15 miagi sa makuting pagtuon ug  deliberasyon  sa mga hintungdang  komite sa konseho ug nasuta nga nahiuyon sa balaod ug mahimo nang ipatuman sa labing daling panahon.

Ang resolusyon nga gisagop sa konseho alang sa maong katuyoan gipaluyohan sa Komite sa Barangay Affairs ni Konsehal Yan Lam Lim ug sa Komite sa Pamalaod ubos ni  Konsehal Edgar Cabanlas.