Mga programa sa SK Brgy. 38, mapatuman na

MAHIMO nang mapatuman sa Sangguniang Kabataan sa Barangay 38 ang mga programa ug proyekto nga ilang gipundohan karong tuiga, human giaprobahan sa konseho sa dakbayan ang ilang budget nga adunay gibanabanang kinitaan ug galastohon nga mokabat sa ₱367,474.00.

Balor sa ₱171,556.00 gikan sa maong pundo ang gigahin alang sa pagpatuman sa nagkalain-laing programa para sa pagpalambo sa kabatan-onan sa aspeto sa edukasyon, partisipasyon sa komunidad pinaagi sa selebrasyon sa Linggo ng Kabataan, pagpanalipod sa kalikupan, maayong panggobyerno, ug panglawas.

Lakip usab sa giaprobahang budget ang ₱91,800.00 alang sa honoraria sa mga miyembro sa SK, ug ₱104,118.00 para sa Maintenance and Other Operating Expenses (MOOE). Ang MOOE naglakip sa mga gasto alang sa opisyal nga mga biyahe, pagdumala sa mga training, pagpalit sa suplay sa opisina, uniporme, pagdumala sa SK Assembly, pag-ayo ug pagmintinar sa mga ekipo, fidelity bond premium, ug annual dues sa SK Federation, ug uban pang kinahanglanon alang sa epektibong pagpadagan sa ilang buhatan.

Ang resolusyon nga gisagop sa konseho alang sa maong katuyuan gipaluyuhan sa komite sa sports and youth development ubos ni Konsehal Kenneth John Sacala, ug sa komite sa pamalaod ug reglamento ni Konsehal Edgar Cabanlas. (SPEscoltos/SP)