Mga programa sa SK Bayanga mapatuman na

HINGPIT nga ma-implementar sa Sangguniang Kabataan (SK) sa Barangay Bayanga ang ilang mga prorama alang sa kabatan-onan sa ilang dapit.

Kini human ang konseho atol sa sesyon kagahapon nga gidumala ni Bise Mayor Bebot Rodriguez misagop og resolusyon nga nag-uli sa ilang resolusyon nga may kalabutan sa ilang Annual Budget gikan sa bulan sa Enero ngadto sa Disyembre ning tuig nga mokabat sa ₱713,694 mil.

Sa maong pundo, diha kuhaon ang honorarium, maintenance and operating expenses sa buhatan ingon man ang mga programa alang sa  panglawas, edukasyon, peace building ug security, active citizenship, environment, ug global mobility.

Gilantaw nga sa kasamtangang tuig, labing mapalambo ug mapalapdan sa SK Bayanga ang mga programa sa kabatan-onan dili lang sa natad sa paugnat sa kusog apan apil  na  sa aspeto nga maghatag kaayuhan sa kinabuhi sa ilang ginsakopan.

Ang resolusyon nga gisagop sa konseho alang sa maong katuyoan gipaluyohan sa komite sa youth and sports development ni Konsehal Kenneth John Sacala ug komite sa pamalaod ug reglamento ubos ni Konsehal Edgar Cabanlas. (Text and photo by JRG/SP)