Mga programa sa kabatan-onan sa Brgy. 37 mapatuman na

DUGANG mga programa ug proyekto sa Sanguniang Kabataan (SK) sa Barangay 37 nga gipundohan karong tuiga hayan mapatuman na.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay kinitaan ug galastuhon balor P376,830.00.

Lakip sa gipundohan nga diin dako ug ikatabang sa kabatan-onan nga malikay sa bisyo mao ang anti-drug abuse campaign; P30mil usab ang gigahin alang sa pagpatuman sa health services samtang P10 mil alang sa ilang governance leadership training ug uban pang mga programa nga gilantaw’ng maghatag serbisyo sa kabatan-onan.

Ang 2025 annual budget miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho gipangamahanan ni Konsehal Kenneth John Sacala ug gipaluyohan sa komite sa pamalaod ni Konsehal Edgar Cabanlas. (MLRapanot/SP)