Mga programa, proyekto sa Consolacion mapatuman na

HINGPIT nang mapatuman sa konseho sa barangay Consolacion ang ilang mga programa ug proyekto karong tuiga.


Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa Consolacion diin nasukip ang ilang 2022 Annual Budget.


Lakip sa gihatagan og prioridad sa barangay mao ang programa paghinlo sa mga kanal, pagsemento sa pathways ug pagrehabilitar sa barangay hall ingon man sa ilang health center.


Dugang niini, migahin usab sila og igong pundo alang sa pag-instalar sa suga sa kadalanan, pagpalambo sa daycare center, pagtukod og material recovery facility, reading center; materials, pag-instalar og deep well, pagpalit og sakyanan nga magamit sa ilang waste management ug uban pa nga maghatag og dugang kalamboan sa ilang dapit.


Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya. (SP/JRGalano)