Mga programa, proyekto sa Brgy. Tablon mapatuman na

MAHIMO nang ipatuman sa Barangay Tablon ang ilang mga gihan-ay nga mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P48,364,855.00.

Lakip sa gipundohan mao ang 20 porsyentong (20%) Development Fund balor P5,936,154.00; samtang P4,836,486.00 usab ang gigahin alang sa pagpatuman sa mga programa sa Sangguniang Kabataan; P1,692,770.00 alang sa Barangay Disaster Risk Reduction Management Fund; P250,000,00 sa programa sa Senior Citizens; P1,936,154.00 ang gigahin alang sa construction sa ilang Rural Health Unit para sa Botika sa barangay ug uban pang mga programa nga gilantawng maghatag ug kaarangan sa ilang serbisyo ngadto sa katawhan.

Ang 2025 annual budget sa Barangay Tablon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)