Mga programa, proyekto sa Brgy. Macasandig mapatuman na

MAHIMO nang ipatuman sa Barangay Macasandig ang ilang gihan-ay nga mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay kinitaan ug galastuhon balor P33,991,707,00.

Lakip sa gipundohan mao ang 20 porsyentong (20%) Development Fund balor P5,633,899.00; samtang P3,399,171.00 ang gigahin alang sa pagpatuman sa mga programa sa Sangguniang Kabataan; P1,699,585.00 alang sa Barangay Disaster Risk Reduction Management Fund; P1,500,000.00 ang gigahin alang sa rehabilitasyon sa Multi-Purpose sa Centro Macasandig; P663,899.00 alang sa declogging sa mga kanal sa tibook Barangay Macasandig ug uban pang mga programa nga gilantawng maghatag og kaarangan sa ilang serbisyo ngadto sa katawhan.

Ang 2025 annual budget sa Barangay Macasandig miagi sa makuting pagtuon sa mga komite sa konseho ug nasuta nga nahiuyon sa balaod ug mahimong ipatuman sa labing dali nga panahon.

Ang resolusyon nga gipalabang sa konseho alang sa nasangpit nga katuyoan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ug reglamento ni Konsehal Edgar Cabanlas. (MLRapanot/SP)