Mga programa, proyekto sa Brgy. F.S Catanico mapatuman na

MAHIMO nang ipatuman sa Barangay FS Catanico ang ilang gihan-ay nga mga programa ug proyekto nga gipundohan karong tuiga.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan og galastohon balor P6,891,410.00.

Lakip sa gipundohan mao ang 20 porsyentong (20%) Development Fund balor P1,126,746.00; samtang P689,146.00 usab ang gigahin alang sa pagpatuman sa mga programa sa Sanguniang Kabataan; P344,571.00 alang sa Barangay Disaster Risk Reduction Management Fund; P350,000.00 ang gitagana alang rehabilitasyon sa ilang water supply; P159,212.00 alang sa instalasyon sa ilang street lights; P10 mil ang gigahin sa programa sa Senior Citizens ug uban pang mga programa nga gilantaw’ng maghatag og kaarangan sa ilang serbisyo ngadto sa katawhan.

Ang 2025 annual budget sa Barangay FS Catanico miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (MLR/SP)