Mga programa, proyekto sa Barangay 28, suportado sa konseho

SUPORTADO sa konseho sa dakbayan ubos ni Bise Mayor Bebot Rodriguez ang mga programa ug proyekto sa Barangay 28.

Sa sesyon niadtong Lunes, hiniusang gisagop sa konseho ang resolusyon nga nag-uli sa ordinansa sa maong barangay nga may kalabotan sa ilang 2025 Annual Budget nga adunay gibana-banang kinitaan ug galastohon balor P4 milyones kapin  alang sa implementasyon.

Tipik sa gigahinan sa barangay sulod sa ilang 20 porsyentong development fund ang paghinlo sa mga canal ug flood control, pagrehabilitar sa ilang day care center, pagtukod og dikes ug dugang canals sa interior nga bahin paingon sa dalang Osmena, pagrehabilitar sa ilang entablado, pagsemento sa pathways sa Purok 4 ug pagrehabilitar sa mga sementadong silya sa basketball court.

Dugtong niini, migahin usab ang barangay og igong pundo alang sa mga programa sa Sangguniang Kabataan ug igong pundo alang sa Local Disaster Risk Reduction and Management Council (LDRMMRC) nga magamit panahon sa kalamidad.

Si Konsehal Marlo Tabac misuporta sa maong lakang human nakita nga nahiuyon sa balaod ug mahimo nga ipatuman sa labing dali nga panahon.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Tabac ug komite sa pamalaod ug reglamento ubos ni Konsehal Ed Cabanlas. (JRG/SP)