Mga programa alang sa kamerkadohan suportado ni Goking

Dako ang pagsuporta ni Konsehal George Christopher Goking, chairman sa komite sa trade and commerce, sa mga programa nga nagpalambo ug naghatag dugang kaayohan sa sektor sa merkado publiko sa dakbayan.

Gikalipay sa konsehal ang gimugna sa buhatan sa City Economic Enterprises and Business Development Administration (CEEBDA) uban sa pag-abag sa Department of Trade and Industry (DTI) nga Market Vendors Quiz Bowl diha sa Cogon ug Carmen Public Market.

Kini ang nasaksihan sa konsehal isip usa sa mga kalihokan pahaom sa kasaulogan  sa Consumer Welfare Month nga adunay ganti  sa kantidad P2-mil sa pinaka daghan og insakto nga tubag; P1,500 sa ikaduhang dapit  samtang P1,000 sa ikatulong dapit.

Sa iyang pagtambong, nakita sa konsehal nga ang maong kalihokan nagpalig-on sa kahibalo sa mga magpapatigayon ug nahatag ang dugang impormasyon sa mga balaod o’ patakaran bahin sa katungod sa mga konsumante ug responsibilidad sa mga tigpaninda sa kamerkadohan sa dakbayan. (RNQ/SP)