Mga Progama sa CdOTVI padayong gisuportahan ni Konsehal Suzette

SI Konsehal Suzette Magtajas-Daba, chairman sa komite sa edukasyon, hugot nga mipasalamat sa kagamhanan ubos ni Mayor Moreno sa walay puas nga pagsuporta sa mga programa sa Cagayan de Oro Technical Vocational Institute (CdOTVI), Inc.

Kini ang unod sa mensahe sa konsehal atol sa Monday Virtual flag raising ceremony sa City Hall kagahapon nga gidumala sa CdOTVI, Inc.

Gipasabot sa konsehal nga taliwala sa nasinating pandemya nagpadayon ang mga programa sa CdOTVI nga nagtinguhang mahatagan prayoridad ang sektor sa Out of School Youth (OSY) aron sila maabagan sa pagbangon ug makab-ot ang ilang pangandoy sa kinabuhi .

Mahinumdoman nga sa tuig 2019 ang CdOTVI napiling National Kabalikat awardee, usa ka prestihiyusong award gikan sa TESDA.

Daghang mga trainees nga malampusong nakatapos sa ilang mga kurso nga magdala kanila sa kapabalidad nga mokita ug naghatag dugang kaarangan sa dagan sa ekonomiya dili lamang sa syudad lakip na sa mga kasikbit nga dapit,pamahayag ni Konsehal Daba.

Niini gipasalamatan ug gipahalipayan ni konsehal Daba ang tanan nga nag-abag aron padayong makab-ot ang mga dugang kalamposan sa mga programa sa CdOTVI ug malaumon nga pinaagi sa pagtinabangay dugang kalamboan ang makab-ot sa katawhan sa dakbayan.