Mga masustansyang pagkaon angayang itinda sa mga food establishments -Esparcia


GIHINGUSGAN ni Konsehal Bernie Esparcia, vice chairman sa komite sa arbitration, nga kadtong mga masustansya nga pagkaon ug ilimnon ang ibaligya sa mga food establishments sa dakbayan.

Kini ang unod sa gipasakang sugyot ordinansa sa konsehal nga giduso ni Bise Mayor Bebot Rodriguez ngadto sa komite sa health and health insurance ni Konsehal Malou Gaane.

Ang maong sugyot ordinansa tubag sa nadawat nga mulo ni Esparcia gikan sa katawhan ilabina sa mga kabataan ug katigulangan nga buot makabaton og himsog nga panglawas.

Matod sa konsehal nga angayang likayan ang mga pagkaon nga taas sa cholesterol, sodium, saturated fats, trans fats, taas og asukar kay maoy gitumbok nga hinugdan sa mga chronic diseases ug uban pang makamatay nga balatian.

Segun sa World Health Organization (WHO) ang healthy diet naglakip sa pagkaon sa mga utanon, prutas, whole grains, root crops, fat-free o low-fat milk, lean meat, karneng manok, isda, itlog, beans ug mani, pasabot ni Konsehal Esparcia. (SP/JRGalano)