Mga mangingisda sa Barangay Agusan nakadawat og ayuda gikan ni Konsehal Lim

“GINAGMAY apan kinasing kasing nga pagtunol sa ayuda ngadto sa mangingisda sa Barangay Agusan ning syudad.”

Kini ang pamahayag ni Konsehal Yan Lam Lim, chairman sa komite sa Barangay Affairs sa konseho human mitunol og ayuda ngadto sa 220 ka mga mangingisda sa nahisgutang barangay.

Matod ni Lim nga bisan og ginagmay lang ang iyang gitunol apan nalipay siya nga nakatabang sa maong sektor ning panahon sa kalisod nga ilang giatubang tungod sa pandemya.

Nanghinaot ang konsehal nga daghan pang katawhan ang iyang matabangan labi na gayud kadtong labaw nga nanginahanglan ning panahona.

Nunot niini, nagpasalamat si konsehal Lim ni Kapitan Andrew Melliza ug ubang opisyales sa barangay sa ilang pag-abag atol sa maong kalihukan.