Mga gihan-ay nga proyekto sa Brgy. 19 mapatuman na

HAYAN mapatuman na sa Barangay 19 ang ilang gihan-ay nga mga programa ug proyekto nga gipundohan karong tuiga.

Kini human ang konseho sa syudad sa milabayng sesyon nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa maong barangay diin nasukip ang ilang 2025 Annual Budget nga adunay gibanabanang kinitaan ug galastohon balor P3,794,679.00.

Lakip sa gipundohan mao ang 20 porsyentong (20%) Development Fund balor P502,526.00; samtang P379,468.00 usab ang gigahin alang sa pagpatuman sa mga programa ug proyekto sa Sangguniang Kabataan; P20,000.00 ang gipundo alang pagpalapad sa kampanya sa Barangay Anti-Drug Abuse Council BADAC; P100,000.00 alang sa installation sa nadaot nga mga street lights; P100,000.00 alang sa rehabilitasyon sa ilang multi-purpose hall ug uban pang mga programa nga gilantawng maghatag og dugang kaarangan sa ilang serbisyo ngadto sa katawhan.

Ang 2025 annual budget sa Barangay 19 miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Marlo Tabac ug sa komite sa pamalaod ni Konsehal Edgar Cabanlas. (MLR/SP)