Mga empleyado sa City Hall, kapolisan, kapitanes, uban pa gipasalamtan ni Lim

HUGOT nga gipasalamatan ni Konsehal Yan Lam Lim, chairman sa komite sa Barangay Affairs ang tanang empleyado sa City Hall kinsa nahimong kabahin sa gipahigayong pagpang-apod-apod sa Emergency Cash Ayuda ngadto sa katawhan nga naapektohan sa Enhanced Community Quarantine (ECQ) di palang dugay.

Sa sesyon sa konseho niadtong Lunes nga gidumala ni Bise Mayor Kikang Uy, gidayeg ug gipasalamatan ni Lim ang mga empleyado tungod sa ilang paningkamot nga mahatod ang ayuda ngadto sa ilang tagsa tagsa ka panimalay taliwala sa mga kakulian nga ilang gisagubang.

Gipasalamatan usab sa konsehal ang kapolisan sa ilang pagbantay sa seguridad ug pag-asistar samtang kamolo ang mga cashiers sa pag-apod-apod sa ayuda.

Dugang niini gipasalamatan usab ni Lim ang mga kapitanes, barangay kagawad, tanods, empleyado ug mga zone leaders sa ilang pag-asistar paghatag direksyon diha sa pagtumbok sa mga benepisaryo ug ang tanan nga miabag sa maong kalihokan.

Hinoon giangkon ni Lim ang adunay mga minor nga lapses sa nasampit nga distribusyon apan mipasabot nga walay perfecto nga sistema tungod sa limitado ang panahon ug preparasyon ug nanghinaot nga kini masabtan sa tanan.