Mga dalan likod sa SM gipasuta kon nadeklara na isip city roads -Abaday

GIHANGYO ni Konsehal Roger Abaday, chairman sa  komite sa public utility sa Konseho, ang mga hintungdan komite sa pagsuta kon ang mga dalan dapit sa SM North Wing nadeklara na ba isip city roads.

Kini ang reaksyon  sa konsehal sa special report ni Konsehal Jonjon Rodriguez atol sa sesyon sa konseho niadtong Lunes nga gidumala ni Bise Mayor Bebot Rodriguez mahitungod sa  nahitabong pag-clamp sa sakyanan sa usa ka PWD, kinsa nakadawat usab sa panginsulto gikan sa enforcer nga nagsita kaniya.

Sumala ni Abaday nga siya usab nakasinati nga gi-clamp ang iyahang  sakyanan  ug gibinlan kini sa citation ticket, uban ang pasidaan nga kon dili kini niya  mabayaran sulod sa 72 ka oras, siya kasohan ug dili na tugutan  nga makaparada. Tungod niini, misulay siya sa pagbayad  aron madeterminar ang legalidad sa koleksyon sa resibo  niini.

Gipasabot  sa konsehal nga kinahanglan masuta kon kining mga dalana nadeklara naba isip city roads tungod kay dili lang mga gwardiya ang gapangolekta sa dapit  aduna usab mga tawo nga gaboot og pangolekta sa nakaparking dool sa mga amusement places sa dapit.

Gisugyot  ni Konsehal Abaday nga maimbestigan ang maong insidente. (JRG/SP)