Mga billboard, advertisementnga natukod gipasuta ni Konsehal Seno

GIKINAHANGLAN adunay kongkretong ordinansa aron sa pag-abag sa implementasyon sa National Building Code of the Philippines alang sa seguridad sa katawhan sa dakbayan.

Kini ang hugot nga gipaabot ni Konsehal John Michael Seno, chairman sa komite sa sports & youth development atol sa sesyon niadtong Lunes nga gidumala ni bise mayor Kikang Uy nga may kalabotan sa pagpahimotang og mga istraktura sa billboard and advertisements dinhi sa syudad.

Gibutyag ni Konsehal Seno nga adunay pipila ka giugbokan sa billboards dinhi sa syudad nga nakalapas sa Presidential Degree 1096 kon Building Code of the Philippines ug Republic Act 386 kon Civil Code of the Philippines.

Matod sa konsehal nga adunay billboard diha sa Masterson Avenue nga ang giturokan sa istraktura niini ang riprap project sa gobyerno, ang megadike project sa Pelaez Bridge nga agianan sa mga tawo pero gihimong pundasyon sa istraktura.

Gidugang usab nga ang dapit dool sa Marcos Bridge nga gideklara nga “No Build Zone” sa panahon ni kanhi President Aquino gitukoran usab sa susamang istraktura ug diha sa Villarin Street, Carmen nga diiin ang linya sa kuryente nakasulod gyud sa maong istraktura hinungdan nga nakahatag pelegro sa katawhan.

Niini, si Konsehal Seno kusganong mihangyo sa konseho nga mahatagan kini og igong pakisusi ug sutaon kun aduna bay permit ug nakasubay ba sa Building Code of the Philippines og Civil Code of the Philippines ang maong mga istraktura.

Ang maong taho giduso ni Bise Mayor Kikang Uy ngadto sa Committee of the Whole nga dumalaon ni Konsehal Romeo Calizo, chairman sa komite sa public order & safety uban ni Konsehal Enrico Salcedo, chairman sa komite sa Environment alang sa daling aksyon og disposisyon sa maong butang.