Mga atletang Kagay-anon gipahalipayan

GIDAYEG ug gipahalipayan sa konseho sa syudad ubos ni Bise Mayor Bebot Rodriguez ang mga atletang Kagay-anon nga nangdaog ug nakasakmit og medalya sa lain laing dula atol sa gipahigayong Batang Pinoy Games didto sa General Santos City bag-ohay  palang.

Sa sesyon sa konseho niadtong Lunes, gisagop sa konseho ang Resolution No. 2025-119 nga nagpadayag sa ilang pagdayeg tungod sa nakab-ot nga kalampusan sa maong mga atleta nga naghatag og kadungganan sa dakbayan.

Si Konsehal Kenneth John Sacala, SK Federation President ug chairman sa komite sa youth and sports, nalipay  sa maong kalamposan ug nanghinaot nga magpadayon ang kaikag ug dedikasyon sa mga atleta sa ilang gikahiligang dula alang sa mahayag nilang kaugmaon.

Ang resolusyon nga gipalabang sa konseho alang sa maong katuyoan gipaluyohan sa komite sa youth ni Konsehal Kenneth John Sacala ug komite sa pamalaod ug reglamento ubos ni Konsehal Edgar Cabanlas. (JRG/SP)